Plantun de Prouvènço

Pèr coumpara dos planto d'encò nostre

Cerastium cerastoides & Picea abies

Cerastium cerastoides

Caryophyllaceae

Noms en français : Céraiste à trois styles, Céraiste faux céraiste.

Descripcioun :
Aquéu ceraiste trachis dins li pelouso e li coumbo à nèu d'auto mountagno. Es uno planto pas bèn grando que rebalo au sòu. A tres estile (fotò), e acò lou destrìo eisadamen dóu ceraiste-dre qu'éu n'a 5. Souventi-fes a quàsi ges de péu.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 3 à 15 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Cerastium
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 10 à 15 mm
Flourido : Printèms - Estiéu

Sòu : Si
Autour basso e auto : 1800 à 2300 m
Aparado : Noun
Jun à setèmbre

Liò : Pelouso - Coumbo à nèu
Estànci : Subaupen à Aupen
Couroulougi : Artico-Aupenco
Ref. sc. : Cerastium cerastoides (L.) Britton, 1894 (= Cerastium trigynum Vill. )

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.